പക്വത

*പക്വത* പലരും പറയുന്നത് കേൾക്കാം അവന് അല്ലെങ്കിൽ അവൾക്ക് പക്വത ഇല്ലെന്ന്! കഴിഞ്ഞ ദിവസവും എന്നെപ്പറ്റിയും ഇങ്ങനെ പറയുന്നത് കേട്ടു. പക്വത എന്നതുകൊണ്ട് ഇവർ എന്താണ് ഉദ്ദേശിച്ചതെന്നു എനിക്ക് മനസ്സിലായില്ല. ആളുകൾ പ്രായത്തിനനുസരിച്ച് പക്വത പ്രാപിക്കുന്നു എന്ന് സാധാരണയായി അനുമാനിക്കുന്നു, എന്നാൽ ഞാൻ ഉൾപ്പെടെ പലരും പ്രായപൂർത്തിയാകുകയും പക്വത പ്രാപിക്കുകയും ചെയ്തിട്ടില്ലെന്നു പറഞ്ഞാലും അത്ഭുതമില്ല. മനുഷ്യാത്മാവിൻ്റെ പക്വത ജീവിതത്തിൻ്റെ ലക്ഷ്യമാണെന്ന് ഞാൻ മുന്നേ എഴുതിയിട്ടുള്ളതാ. അനിശ്ചിതത്വം സഹിക്കാനുള്ള കഴിവാണ് പക്വത. അഭിനന്ദിക്കാനായി ആരെങ്കിലും വിളിച്ചാൽ പോകുന്ന പോലെത്തന്നെ വിമർശിക്കാനായി ആരെങ്കിലും വിളിച്ചാലും ആ ക്ഷണം സ്വീകരിച്ചു അതിനായി പോകും. കാരണമെന്തെന്നാൽ അഭിനന്ദനം ഒരു സുഖം മാത്രമേ തരൂ എന്നാൽ വിമർശനമാണ് എന്നെ ആന്തരികമായി വളരുവാനും പഠിക്കാനും എന്നെ സഹായിക്കുന്ന ശക്തി.

തിരുവാതിര

*നൃത്ത, നൃത്യ, നാട്യ* _നൃത്തത്തിൻ്റെ ഏറ്റവും അടിസ്ഥാനപരമായ ലക്ഷ്യങ്ങളിലൊന്ന് അതിൻ്റെ ആവിഷ്കാരം._ ഒരു പ്രവർത്തനത്തെ നൃത്തമായി കണക്കാക്കണമെങ്കിൽ, നർത്തകിക്ക് അതിനെ അത്തരത്തിലുള്ളതായി വേർതിരിക്കാനുള്ള കഴിവെങ്കിലും ഉണ്ടായിരിക്കണം. നർത്തകിയും നൃത്തസംവിധായികയുമായ രോഷ്നി തൻ്റെ എർത്ത് എയിഞ്ചൽസിന് വേണ്ടി ഒരു നൃത്തസംവിധായിക എന്ന നിലയിൽ വൈവിധ്യമാർന്ന ചലന ശൈലികൾ ഉപയോഗിച്ചു ചിട്ടപ്പെടുത്തിയ തിരുവാതിരക്കളി സന്ധ്യഭംഗിയുടെ നിലാവു പടർന്ന എറണാകുളം അയ്യപ്പൻകാവ് ക്ഷേത്ര മുറ്റത്ത് രോഷ്നി വിജയകൃഷ്ണന്റെ മനസ്സിലെ തിരുവാതിര ശരീരഭാഷയിലൂടെ ജീവൻ നൽകുന്നതായിരുന്നു. രോഷ്നി വിജയകൃഷ്ണൻ, ഗീത സന്തോഷ്‌, ഷമ്മി ലാൽ, കല ജയറാം, ധന്യ രാജേഷ്, സിനി രാജേഷ്, ജയശ്രീ മുരളി, ജീന മുരുകൻ സ്വയം മറന്ന് തിരുവാതിരച്ചുവടുകളിലേക്ക് ...അവരുടെ മൈലാഞ്ചിചോപ്പുള്ള കൈകൾ പാട്ടിന്റെ താളത്തിൽ ലാസ്യഭംഗിയോടെ മിന്നി മായുന്നു. സാധാരണ നൃത്തരൂപങ്ങളെ അപേക്ഷിച്ച്‌ തിരുവാതിരക്കളിയുടെ ചുവടുകള്‍ക്കും പ്രത്യേകതയുണ്ട്.സാധാരണ ഒരുപാട് വേഗത്തിലുള്ള ചുവടുകള്‍ ഒന്നും തന്നെ ഉപയോഗിക്കാറില്ല. എന്നാൽ വേഗത്തിലുള്ള ചുവടുകളും കാലുകള്‍കൊണ്ട് ചുവടു വെയ്ക്കുമ്പോള്‍ കൈകളും പ്രത്യേക രീതിയില്‍ ചലിപ്പിക്കുന്നതും രോഷ്‌ണീസ് എർത്ത് എയിഞ്ചൽസിന്റെ തിരുവാതിര ശ്രദ്ധേയമാക്കുന്നു. തിരുവാതിരക്കളിയില്‍ കാലങ്ങളായി ഒരേ തരത്തിലുള്ള ചുവടുകളാണ് ഉപയോഗിക്കാറുള്ളതെങ്കിലും, ഭാവ പ്രകടനങ്ങൾക്കാളേറെ, ചലനങ്ങള്‍ക്കും ചുവടുകള്‍ക്കും, ശാരീരിക വഴക്കത്തിനും പ്രാധാന്യം നല്‍കുന്നതരത്തിലുള്ള നൃത്തരീതി ആണ് ഇത്തവണ കോറിയോ ഗ്രാഫർ രോഷ്‌ണി വിജയകൃഷ്ണൻ തിരുവാതിരക്കളിയിൽ ആവിഷ്കരിച്ചിരിക്കുന്നത്. ആത്മീയവും , മാനസികവുമായ ആനന്ദത്തോടെ ഒപ്പം തന്നെ, ശാരീരിക ഗുണഫലങ്ങൾ കൂടി സ്ത്രീകൾക്ക് കിട്ടുന്നതാണ് തിരുവാതിരക്കളി. അച്ചടക്കം, ബഹുമാനം, സൗഹൃദം, നേതൃത്വം, സഹിഷ്ണുത, ടീം വർക്ക്, പ്രതികൂല സാഹചര്യങ്ങളെ തരണം ചെയ്യൽ എന്നിവയിലൂടെ വളർച്ചയുടെയും വികാസത്തിൻ്റെയും നിർണായക ഭാഗമായി ഇന്ന് എർത്ത് എയിഞ്ചൽസ് മാറിയിരിക്കുകയാണ്. മലയാളിയുടെ സാംസ്കാരിക പാരമ്പര്യം കാത്തുസൂക്ഷിക്കുന്ന വേഷവിധാനവും താളവും ഈണവും തന്നെയായിരുന്നു ഈ തിരുവാതിര കളിയുടെ പ്രത്യേകതയും. കൂടുതൽ അപ്‌ഡേറ്റുകൾക്ക് : jayaar © 2025 ഫോട്ടോ കടപ്പാട് : ലാൽ

പി എൻ പ്രസന്ന കുമാർ

*ഓർമ്മകൾ മരിക്കുന്നില്ല.* ചെക്കോസ്ലൊവാക്യയിലെ പ്രാഗില്‍ നിന്നും ജേണലിസത്തില്‍ ഫെലോഷിപ്പ് നേടി. കേരള യൂണിവേഴ്‌സിറ്റി യൂണിയന്‍ എക്‌സിക്യൂട്ടീവ് മെമ്പറായി പിന്നീട് വീക്ഷണം പത്രത്തിന്റെ കൊച്ചി ബ്യൂറോയില്‍ ചീഫ് റിപ്പോര്‍ട്ടറായി ഇരിക്കുമ്പോൾ ആണ് ജേർണലിസം കഴിഞ്ഞു നിൽക്കുന്ന എനിക്ക് വീക്ഷണവുമായി ചേർന്ന് പ്രവർത്തിക്കുവാനുള്ള അവസരം പ്രസന്നൻ ചേട്ടൻ നൽകുന്നത്. മനസിൽ അക്ഷരങ്ങൾ കൊണ്ട് മഴവില്ല് തീർത്ത കാലം. എഴുത്തിന്റെ വെളിച്ചം എനിക്കു നൽകിയ പ്രസന്നൻ ചേട്ടനെ സ്നേഹത്തോടെയല്ലാതെ എനിക്കോർക്കാൻ കഴിയില്ല. പ്രത്യക്ഷത്തിൽ വാചാലരാകാറില്ലെങ്കിലും കണ്ണുകൾ കൊണ്ട് സംസാരിക്കുകയും മനസ് കൊണ്ട് അനുഗ്രഹിക്കുകയും ചെയ്തിരുന്ന പ്രസന്നൻ ചേട്ടനെയും, വീക്ഷണത്തിലെ ദത്തൻ സാറിനെയും, എ ഡി രാജൻ സാറിനെയും എനിക്കൊത്തിരി ഇഷ്ടമായിരുന്നു. ഞങ്ങളുടെ ഇടയിലെ സ്നേഹം, സഹവർത്തിത്വം ഇവയെല്ലാം പിന്നീട് ഓ ർക്കാനുള്ള മധുരമുള്ള സന്ദർഭങ്ങളായിത്തീരുകയായിരുന്നു. വീക്ഷണത്തിൽ നിന്നും പിന്നീട് മനോലോകത്തിനും ക്രൈംമിന് വേണ്ടിയും പ്രവർത്തിക്കുമ്പോഴും പ്രസന്നൻ ചേട്ടനെ കാണാൻ വീക്ഷണത്തിൽ പോകാറുണ്ടായിരുന്നു. ജയ് ഹിന്ദ് ചാനൽ ആരംഭിച്ചപ്പോഴും എന്നെ അദ്ദേഹം വിളിച്ചിരുന്നു. ഒരു പത്രപ്രവർത്തകൻ മാത്രമായിരുന്നില്ല പ്രസന്നൻ ചേട്ടൻ. മണ്ണില്‍ കാലു തൊട്ടു നില്‍ക്കുന്ന പച്ച മനുഷ്യനായിരുന്നു. കാപട്യം കലരാത്ത രാഷ്‌ട്രീയക്കാരനായിരുന്നു. പത്രപ്രവർത്തക ലോകത്ത് നിറഞ്ഞ് നിൽക്കുമ്പോൾ തന്നെ അദ്ദേഹം ഞാൻ താമസിക്കുന്ന ഡിവിഷനിലെ കൗൺസിലർ ആയി രണ്ട് തവണ തെരഞ്ഞെടുക്കപെട്ടിട്ടുണ്ട്. ജനപ്രതിനിധി എന്ന നിലയിലും അദ്ദേഹം മികവുറ്റ പ്രവർത്തനം കാഴ്ചവെച്ചു. പ്രസന്നൻ ചേട്ടനുമായി എനിക്ക് പുലർത്താൻ കഴിഞ്ഞ ആത്മബന്ധം എന്റെ ജീവിതത്തിലെ വലിയ മുതൽക്കൂട്ടു തന്നെയാണ്. ഇന്നും ഒരു റോഡിന്റെ മറുവശത്തു നിന്നുകൊണ്ട് അല്ലെങ്കിൽ എതിരെയുള്ള വാഹനത്തിൽ യാത്രചെയ്തു കൊണ്ട് മറുവശത്തുള്ള മറുവശത്തു കൂടി പോകുന്ന എന്നെ കണ്ടാൽ നോക്കി പുഞ്ചിരിച്ചു അനുഗ്രഹവർഷം ചൊരിയുന്ന പ്രസന്നൻ ചേട്ടൻ ഇനി ഓർമകളിൽ മാത്രം. പ്രിയ പ്രസന്നൻ ചേട്ടന് പ്രണാമം.

Brackish Kayal Resort

@ *Brackish Kayal Resort* #Cherai #Kochi #India

ആരാരും കാണാതെ

*ആരാരും കാണാതെ...* രോഷ്‌ണീസ് എർത്ത് എയിഞ്ചൽ സിന്റെ വിന്റർ ഫെസ്റ്റ് 2024 ൽ പങ്കെടുക്കുവാൻ ചെറായിലെ ബ്രാകിഷ് കായൽ റിസോർട്ടിന്റെ കവാടം എത്തുമ്പോൾ ഗിരീഷ് പുത്തഞ്ചേരി എഴുതി വിദ്യസാഗർ ഈണം പകർന്ന് ജയചന്ദ്രൻ ആലപിച്ച ചന്ദ്രോത്സവത്തിലെ ആരാരും കാണാതെ ആരോമൽ തൈമുല്ല പിന്നേയും പൂവിടുമോ... ഈ വരികളുടെ സംഗീതം കേൾക്കാമായിരുന്നു. എനിക്കും എന്റെ സഹധർമ്മിണിക്കും ഈ വരികളോട് അഭേദ്യമായ ബന്ധം ഉണ്ട്. മറ്റൊന്നും അല്ല എന്റെ വിവാഹം കഴിഞ്ഞ് എറണാകുളത്തേക്ക് യാത്ര തിരിക്കുന്നതിന് മുന്നെയായി കല അമ്മയുടെയും അവരുടെ ചേട്ടൻമ്മാരുടെയും ഏട്ടത്തിമാരുടെയും കാലിൽ വീണ് അനുഗ്രഹം വാങ്ങുമ്പോൾ ലൗഡ് സ്പീക്കറിലൂടെ ഉയർന്ന് കേട്ടത് ഈ വരികൾ ആയിരുന്നു. ബ്രാക്കിഷിന്റെ കവാടം കടന്ന് ചെല്ലുമ്പോൾ ഒരിക്കൽ കൂടി ഈ വരികൾ കേട്ടപ്പോൾ ഞാൻ ഒരു നിമിഷം 2006 ലേക്ക് തിരിച്ചു പോകുകയായിരുന്നു. ഏതെങ്കിലും യുട്യൂബ് ചാനലിൽ നിന്നും ആയിരിക്കും ഈ ഗാനം വെച്ചിരിക്കുന്നത് എന്ന ധാരണയിൽ ആയിരുന്നു ഞാൻ. എന്നാൽ പ്രധാന ഹാളിൽ കടന്നെത്തുമ്പോൾ ആണ് മനസിലാകുന്നത് ഗാനം ആലപിച്ചിരുന്നത് യുവ സംഗീത സംവിധായകനും ഗായകനുമായ പ്രസാദ് ആയിരുന്നെന്ന്. പ്രസാദിന്റെയും ബിനീഷിന്റെയും കഴിവിനെക്കുറിച്ച് രോഷ്നി എന്നോട് നേരത്തെ പറഞ്ഞിട്ടുള്ളതാ. ഈ വേദിയിൽ വെച്ച് രണ്ട് മികച്ച കലാകാരൻമാരെ എനിക്ക് പരിചയപ്പെടുവാൻ സാധിച്ചു. പ്രസാദ് പൊന്നാനിയെയും ബിനീഷ് കതിരേറ്റത്തെയും. വിന്റർ ഫെസ്റ്റ് 2024 പ്രോഗ്രാമിന്റെ ഹൈലൈറ്റ് എന്ന് പറയാവുന്നത് പ്രസാദിനെയും ബിനീഷിനെയും കൂടാതെ പാലക്കാട് നിന്നെത്തിയ കൊച്ചു ഗായിക അനാമികയുടെയും അന്ന വിനോദിന്റെയും അവന്തികയുടെയും പെർഫോമെൻസ് തന്നെയായിരുന്നു. പ്രസാദ് പൊന്നാനി ഒരു മികച്ച ഗായകനും സംഗീത സംവിധായകനും കൂടിയാണ്.ഭാവി ശ്രമങ്ങൾക്ക് പ്രസാദിന് എല്ലാ ആശംസകളും നേരുന്നു. ഇന്ത്യ യിലുടനീളമുള്ള കൂടുതൽ യുവാക്കളെ നിങ്ങൾ പ്രചോദിപ്പിക്കട്ടെ. © 2024 jayaar

ആനയും അമ്പാരിയും ഇല്ലാതെ എന്ത് ഉത്സവം

*ആനയും അമ്പാരിയും ഇല്ലാതെ എന്തോന്നുത്സവം*! _പാരമ്പര്യങ്ങളെ അനുസ്മരിക്കാൻ ഒത്തുചേരുന്ന ഈ ആഘോഷങ്ങൾ സംസ്ഥാനത്തിന്റെ മതപരമായ വൈവിധ്യത്തെ കോർത്തിണക്കുന്നതാണെങ്കിലും ഇന്ന് സ്ഥിതിയാകെ മാറിമാറിഞ്ഞിരിക്കുന്നു._ ക്ഷേത്രത്തിലെ ചൈതന്യം ഉത്സവസമയത്തു നടക്കുന്ന ചടങ്ങുകളുടേയും ബലികളുടെയും, ശുദ്ധികർമ്മങ്ങളുടേയും ഫലമായി വർദ്ധിച്ചു പൊങ്ങി വിഗ്രഹത്തിൽ നിന്നു ശ്രീകോവിലിലേക്കും, ചുറ്റമ്പലങ്ങളിലേക്കും മതിൽകെട്ടിനകത്തേക്കും വ്യാപിച്ച് അവിടെനിന്ന് വീണ്ടും ഉയർന്ന് ക്ഷേത്രം നിൽക്കുന്ന മാറ്റിടങ്ങളിലേക്കും മുഴുവൻ പരന്ന് പ്രദേശമാകെ ഐശ്വര്യം പരത്തുന്നു എന്നാണ്‌ ഉത്സവത്തെ സംബന്ധിച്ചുള്ള വിശ്വാസം. ഉത്സവം ആഘോഷിക്കുന്നതിലെ സത്യസന്ധതയാണ് പഴയകാലം മുന്നോട്ട് വച്ചതെങ്കിൽ ഇന്ന് അതാണോ സ്ഥിതി?! ഉത്സവങ്ങള്‍ക്ക് ഉണ്ടായിരുന്ന നന്‍മയും തനിമയും ശാലീനതയും നഷ്ടമായിരിക്കുന്നു .ഇപ്പോള്‍ എല്ലാം സ്‌പോന്‍സറിങ്ങാണ്. ചാനല്‍ പരിപാടികള്‍ക്കിടയില്‍ പറയുംപോലെ ഉത്സവങ്ങളുടെ ഓരോ ഭാഗവും നാട്ടിലെ സാമ്പത്തിക ശേഷി കൂടുതല്‍ ഉള്ളവര്‍ സ്‌പോന്‍സര്‍ ചെയ്യുകയാണ്. സമ്പന്നരുടെ പണക്കൊഴുപ്പാണ് ഇപ്പോള്‍ നമ്മുടെ ഉത്സവങ്ങള്‍ക്ക് കൊഴുപ്പ് കൂട്ടുന്നത്. ഉത്സവത്തിന് കൊടിയേറാന്‍ കൊടിമരത്തില്‍ ചേര്‍ക്കേണ്ട കൊടിക്കൂറ വരെയും സ്‌പോന്‍സറിങ്ങിലൂടെ കണ്ടെത്തുകയാണ്. ഉറക്കമൊഴിയാന്‍ തയ്യാറായിരുന്ന ഒരു പഴയകാലമൊന്നുണ്ടായിരുന്നു എനിക്ക്. നാട്ടിലെ ഏഴ് പകലും രാവും ചലനാത്മകമായി നിര്‍ത്തിയ ഉത്സവ രാവുകൾ ഒളിമങ്ങുകയാണോ? വീടിന് അടുത്ത അമ്പലത്തിലെ ഉത്സവം കാണുവാന്‍ പോവുക എന്നത് ഒഴിച്ചു കൂടാന്‍ പറ്റാത്ത ഒന്നായിരുന്നു. ആബാലവൃദ്ധമാണ് ഉത്സവത്തിനായി എത്തിയിരുന്നത്. വെടിക്കെട്ട്‌ കഴിഞ്ഞുള്ള രാത്രിയിലെ കലാപരിപാടികള്‍ കാണാൻ മുൻനിരയിൽ ഇരിപ്പിടം കണ്ടെത്താനുള്ള ഓട്ടം ഉണ്ടല്ലോ അതിപ്പോഴും മറന്നിട്ടില്ല. ഉത്സവ പറമ്പിള്‍ ഇല്ലാത്തതായി ഒന്നുമില്ല. ഒരിടത്ത് പണം വച്ചുള്ള ചീട്ട് കളി. മറ്റൊരിടത്ത് ഒന്ന് വച്ചാല്‍ രണ്ട് കിട്ടും, രണ്ട് വച്ചാല്‍ നാല് കിട്ടും എന്നു പറയുന്ന കുലുക്കി കുത്ത്. തൊട്ടടുത്ത് ആന-മയില്‍-ഒട്ടകം, മണിയടിയും തട്ടുംമുട്ടുമായി കപ്പലണ്ടിയും പട്ടാണിയും വില്‍ക്കുന്നവര്‍. ചാന്തും കണ്‍മഷിയും പൊട്ടും വളയും റിബണും വില്‍ക്കുന്ന വച്ചുവാണിഭ കച്ചവടക്കാരുടെ നീണ്ട നിര. ബലൂണും പീപ്പിയും തോക്കും പൊട്ടാസും പാവയും ഒക്കെയായി മറ്റൊരു കൂട്ടര്‍. ചുക്കു കാപ്പിയും പപ്പട ബോളിയും വില്‍ക്കുന്നവര്‍ വേറെ. ഉത്സപറമ്പുകളില്‍ ഇല്ലാത്തതായി ഒന്നുമില്ല എന്നു പറയുന്നത് വളരെ ശരിയാണ്. എല്ലാം കൂടിച്ചേരുന്ന ഇടമായിരുന്നു ഉത്സവ പറമ്പുകള്‍. പലപ്പോഴും കഥകളിയും ഓട്ടന്‍ തുള്ളലും ഞാൻ കാണാറുണ്ടായിരുന്നില്ല. നാടകവും കഥാപ്രസംഗവും ബാലയുമൊക്കെയാകും മറ്റ് കലാപരിപാടികള്‍. നേരം വെളുക്കുവോളം ഉള്ള പരിപാടികൾ. ഇന്ന് അതൊക്കെ പോയി. രാത്രി 10 മണി കഴിഞ്ഞാൽ ശബ്ദം പാടില്ല. അതുകൊണ്ട് 10 മണിക്ക് ശേഷം പരിപാടികൾ ഒന്നും ഇല്ലാതായി. ഈ നിയമം മൂലം കുറെ കലാകാരന്മ്മാരുടെ കഞ്ഞികുടി മുട്ടിച്ചു എന്നല്ലാതെ മറ്റൊന്നും ഉണ്ടായില്ല. ഇപ്പോൾ ആനകൾക്ക് കൂടെ നിയന്ത്രണം വന്നതോടെ ഉത്സവത്തിന്റെ ഹരം തന്നെ ഇല്ലാതായി. എന്നാൽ അർദ്ധരാത്രി വരെ തുറന്നിരിക്കുന്ന പെട്ടിക്കടകളും, അവിടെ തടിച്ചു കൂടുന്ന സാമൂഹ്യ വിരുദ്ധരും ഒന്നും പ്രശ്നമല്ലത്രേ! എന്റെ കുട്ടിക്കാലത്ത് ഉത്സവത്തിന് പോയികൊണ്ടിരുന്നത് മസാല ദോശ കഴിക്കാനായിരുന്നു വെന്ന് കോറിയോ ഗ്രാഫർ രോഷ്ണി വിജയകൃഷ്ണൻ. എന്റെയൊക്കെ കുട്ടിക്കാലത്ത് വൃതം നോറ്റ് ആണ് ഉത്സവത്തിന് പങ്കെടുത്തിരുന്നത്. ഇന്ന് ആരെങ്കിലും അങ്ങനെ ചെയ്യുന്നുണ്ടോ? മറ്റുള്ളവരുടെ കുറ്റോം കുറവും പറഞ്ഞു വൃതം നോക്കുന്നതിലും അർത്ഥം ഇല്ല. ഭഗവാനെ സ്തുതിച്ചത് കൊണ്ട് ഭഗവാൻ ഒന്നും തരില്ല. നമ്മൾ നമ്മളെ തന്നെ വിലയിരുത്തി നല്ല കർമ്മങ്ങൾ ചെയ്യുക. ഒരു ചോദ്യത്തിന് ഉത്തരമായി അവർ പറഞ്ഞു. ഇന്നത്തെ പോലെ ആന നിയന്ത്രണങ്ങൾ ഒന്നും അന്ന് ഉത്സവങ്ങളിൽ പതിവില്ലാതിരുന്നു. ഉത്സവസ്ഥലത്ത് കുട്ടികളെയും കൂട്ടി പോകുന്നത് ആന ചന്ദം കാണാൻ തന്നെയാണ്. പൂരങ്ങളിൽ ആനകൾക്ക് ഏർപ്പെടുത്തിയ നിയന്ത്രണം വഴി എല്ലാവിധമായ സാമൂഹിക തിന്‍മകളും സാമൂഹിക വിരുദ്ധരും ചേര്‍ന്ന് ഉത്സവങ്ങള്‍ ഹൈജാക്ക് ചെയ്യുകയല്ലേ എന്ന് കരുതുന്നതിൽ എന്താണ് തെറ്റ്!?

Brackish Kayal Resort

*Brackish Kayal Resort* Cherai, Kochi, Kerala This vacation, Explore the enchanting backwaters of Kerala and make wonderful memories with your family and friends. Paddle through calm lake in a kayak, enjoy a fun ride in a pedal boat, try your luck at fishing, taste delicious local food while floating on the water and more fun activities waiting for you! 15+ Cultural Experiences 20+ Activities For information +91 77366 59769